३० भाद्र काठमाडौं। तातोपानी र रसुवा नाका आजदेखि खुला गरिएको छ । कोभिड-१९ को बढ्दो केसहरूलाई उद्धृत गर्दै दुबै चेक पोइन्ट एक महिना भन्दा बढी समयदेखि बन्द गरिएको थियो।
चीनको नेशनल पिपुल्स कंग्रेसका स्थायी कमिटीका अध्यक्ष ली झान्सुको चारदिने नेपाल भ्रमणका क्रममा कोभिड–१९ को सङ्क्रमण घट्दै गएपछि द्विपक्षीय सहमतिपछि सीमा नाका पुनः सञ्चालनमा आएको बताइएको छ ।
आज बिहान रसुवा नाका हुँदै सातवटा ठूला कन्टेनर नेपाल भित्रिएको र आज साँझसम्म सातवटा कन्टेनर नेपाल भित्रिने भन्सार विभागका सूचना अधिकारी पुण्यविक्रम खड्काले जानकारी दिए ।
यसअघि रसुवा नाका हुँदै दैनिक १४ वटा ठूला कन्टेनर नेपाल भित्रिन्थ्यो । अध्यक्ष लीको नेपाल भ्रमणका क्रममा सीमा नाका खोल्न आवाज उठेको थियो । प्रधानमन्त्री शेरबहादुर देउवासँगको शिष्टाचार भेटमा अध्यक्ष लीले चाडपर्वका लागि दैनिक उपभोग्य सामग्री बोक्ने कन्टेनरमा सहजीकरण गर्ने आश्वासन दिएका थिए ।
सभामुख अग्निप्रसाद सापकोटाको निमन्त्रणामा अध्यक्ष ली सोमबार चारदिने नेपाल भ्रमणमा आएका हुन् । चार दिने भ्रमण सकेर उनी आज स्वदेश फर्किएका छन् ।
