प्रधानमन्त्री शेरबहादुर देउवाले सरकारले आगामी मंसिरमा हुने प्रतिनिधिसभा र प्रदेशसभाको निर्वाचन स्वतन्त्र, निष्पक्ष र शान्तिपूर्ण रुपमा सम्पन्न गर्ने प्रतिबद्धता दोहोर्याएका छन् ।
नेपालीहरुको महान चाड बडादशैंका अवसरमा आज शुभकामना सन्देश दिँदै प्रधानमन्त्री देउवाले आवधिक निर्वाचनले लोकतन्त्रलाई सुदृढ गर्ने बताए । स्वतन्त्र र निष्पक्ष निर्वाचनका लागि सबै राजनीतिक दल, सुरक्षा निकाय, निजामती कर्मचारी, नागरिक समाज र सञ्चारमाध्यमको साथ र सहयोग अपरिहार्य रहेको उहाँले औँल्याउनुभयो ।
उनले निर्वाचनले जनताको विकास र समृद्धिको आकांक्षा पूरा गर्ने नीति तथा कार्यक्रम कार्यान्वयन गर्ने नयाँ सरकार गठनको बाटो खुलेको विश्वास व्यक्त गरे ।
प्रधानमन्त्री देउवाले विजयादशमीको अवसरमा स्वदेश तथा विदेशमा रहनुभएका सम्पूर्ण नेपालीमा सुख, शान्ति, समृद्धि, सुस्वास्थ्य र दीर्घायुको कामना गर्नुभएको छ । चाडपर्वहरूले हाम्रो समाजलाई गतिशील र जीवन्त बनाउन र हामीलाई एकताबद्ध बनाउने अमूल्य सांस्कृतिक सम्पदा भएको उनको विश्वास छ ।
प्रधानमन्त्री देउवाले यस पर्वले समाजलाई सत्य, न्याय र अखण्डताको बाटोमा लैजान सबैमा प्रेरणा मिलोस् भन्ने कामना पनि गर्नुभएको छ । असत्यमाथि सत्यको विजय र अन्यायमाथि न्यायको दिनका रुपमा विजयादशमी मनाइन्छ । दशैं जस्ता चाडपर्वले परिवार र समुदायबीच प्रेम, स्नेह, सद्भाव, एकता र सहकार्यको भावना जगाउने गरेको प्रधानमन्त्री देउवाले बताए ।
उनले डेंगुबाट बच्न र सुरक्षाका उपाय अपनाउन पनि सचेत गराए । (RSS)
