नेकपा (एमाले) का अध्यक्ष केपी शर्मा ओलीले स्वस्थ चुनावी प्रतिस्पर्धा गर्न राजनीतिक दलहरुलाई आग्रह गरेका छन् ।
मंगलबार बिटामोडमा आयोजित एक कार्यक्रमलाई सम्बोधन गर्दै पूर्वप्रधानमन्त्री ओलीले सो कुरा बताएका हुन् । बडादशैं, नेपाल संवत्, तिहार, छठ जस्ता चाडपर्वहरूको सन्दर्भमा शुभकामना आदानप्रदान गर्न कार्यक्रम आयोजना गरिएको हो ।
सो अवसरमा ओलीले अस्वस्थ प्रतिस्पर्धा लोकतान्त्रिक अभ्यास हुन नसक्ने बताए । ‘हामीले लामो संघर्षपछि ल्याएको राजनीतिक प्रणाली आफैँमा बहुदलीय प्रतिस्पर्धा हो, प्रतिस्पर्धा स्वस्थ नहुने हो भने त्यो लोकतान्त्रिक राजनीति मानिने छैन’, उनले भने ।
एमाले अध्यक्षले राष्ट्रिय एकता र बहुदलीय प्रतिस्पर्धाको गरिमालाई अक्षुण्ण राख्दै राजनीतिक दलहरुबीच एकता हुन आह्वान गरे ।
दशैंको सांस्कृतिक, सामाजिक र धार्मिक महत्वका बारेमा प्रकाश पार्दै उनले ज्येष्ठ नागरिकबाट आशीर्वाद लिने, नारी शक्तिको पूजा गर्ने र असत्य र असत्यमाथि सत्यको विजयको सन्देश दिने खालको पर्व अरू कतै नरहेको बताए ।
ओलीले विगत २८ वर्षदेखि आफ्नो गृह जिल्ला झापामा १५ दिने बडादशैंको नवौं दिन महानवमीका अवसरमा शुभकामना आदानप्रदान कार्यक्रम आयोजना गर्दै आएका छन् ।
राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देन, नेपाली कांग्रेस झापा जिल्ला कमिटी सचिव कृष्ण हुमागाईं, नेकपा (माओवादी केन्द्र)का युवा नेता रणजित तामाङ, जनता समाजवादी पार्टी झापाका जिल्ला अध्यक्ष दीपेनबाला राईलगायत विभिन्न राजनीतिक दलका नेता, एमाले जिल्लाका नेताहरु सहभागी थिए । कार्यक्रममा उद्योगी व्यवसायी तथा विभिन्न पेशाका व्यक्तिहरुको उपस्थिति रहेको थियो । (RSS)
