व्यास नगरपालिका-१२ मा दुई ठाउँमा पहिरो खसेपछि अवरुद्ध पृथ्वी राजमार्ग सुचारु भएको छ । नगरपालिकामा आज बिहान पहिरो खसेपछि सडक अवरुद्ध भएको हो ।
यसपछि अड्किएका यात्रु र सवारीसाधन गन्तव्यतर्फ लागेका इन्स्पेक्टर राजकुमार सुनारले भने, तर वर्षा जारी रहेकाले पहिरोको जोखिम भने कायमै रहेको बताए । पहिरोको सम्भावनालाई मध्यनजर गर्दै सुरक्षाकर्मीको टोलीलाई तयारी अवस्थामा राखिएको उनले बताए ।
यस्तै, पहिरोले अवरुद्ध भएको म्याग्दे गाउँपालिका–१ गुणदीमा अवरुद्ध सडक खुलेको छ । त्यसलगत्तै एकतर्फी यातायात सञ्चालन गर्न दिइएको छ । सडक पूर्णरुपमा सुचारु गर्न भग्नावशेष हटाउने काम भइरहेको प्रहरीले जनाएको छ । लगातारको वर्षाले मर्मतमा असर परेको उनीहरुले बताए । (RSS)
