निर्वाचन आयोगले प्रतिनिधिसभा र प्रदेश सभाको निर्वाचनलाई ध्यानमा राख्दै मतदाता शिक्षाको दायरा बढाउने निर्णय गरेको छ । आगामी मंसिर ४ मा एकै चरणमा दोहोरो निर्वाचनका लागि मतदान हुने तय भएको छ।
यसै सन्दर्भमा आयोगले आज आफ्नो कार्यालयमा प्रशिक्षकका लागि अभिमुखीकरण आयोजना गरेको छ । सत्रको उद्घाटन गर्दै निर्वाचन आयुक्त डा जानकीकुमारी तुलाधरले मतदाता शिक्षाबारे जनचेतना अभिवृद्धि गर्न सक्दो प्रयास गर्न सहभागीहरुलाई आग्रह गर्नुभयो ।
निर्वाचनलाई स्वतन्त्र र निष्पक्ष बनाउन र निर्वाचनमा अनावश्यक खर्चलाई निरुत्साहित गर्न सरोकारवालाको योगदान अत्यावश्यक रहेको आयुक्तले मतदाता शिक्षाबारे जनतालाई सचेत गराउन आग्रह गरे ।
आयोगका सचिव गोकर्णमणि दुवाडीले तालिमले मतदातालाई मतदानको अधिकार प्रयोग गर्न प्रोत्साहित गर्न र वैध मतपत्रको प्रतिशत बढाउन सहयोग पुग्ने विश्वास व्यक्त गरे । (RSS)
