मधेस प्रदेश मिडिया काउन्सिलका अध्यक्ष शिवहरि भट्टराई सर्लाहीको एक रिसोर्टमा मृत अवस्थामा फेला परेका छन् ।
लालबन्दी नगरपालिका-१३ पथरकोटस्थित होलिडे रिसोर्टको कोठामा शनिबार बिहान ६० वर्षीय भट्टराई मृत फेला परेका थिए ।
नेपाल पत्रकार महासंघ सर्लाही जिल्ला शाखाको ११औँ वार्षिक महाधिवेशनमा सहभागी हुन भट्टराई शुक्रबार साँझ सर्लाही आइपुगेका हुन् । रिसोर्टमा खाना खाएर कोठामा सुतेका थिए ।
जिल्ला प्रहरी कार्यालय सर्लाहीका विजय श्रेष्ठका अनुसार बिहान अबेरसम्म पनि उनी नउठिएपछि होटलका कर्मचारी र उनका साथीले उनको कोठामा चेकजाँच गरेका थिए । उनको शव पोष्टमार्टमका लागि प्रादेशिक अस्पताल मलंगवा लैजाने तयारी भइरहेको डिएसपी विजय श्रेष्ठले बताए ।
भट्टराईको निधनपछि महासंघ सर्लाही शाखाको ११औँ वार्षिक साधारणसभा अर्को सूचना नभएसम्मका लागि स्थगित भएको छ ।
