काठमाडौँ । नेपालको उपल्लो वायुमण्डलमा विकसित भएको उच्च चापीय प्रणालीका कारण मुलुकका विभिन्न भूभागको मौसममा आंशिक परिवर्तन देखिएको छ । जल तथा मौसम विज्ञान विभाग, मौसम पूर्वानुमान महाशाखाका अनुसार यस प्रणालीको प्रभावले विशेष गरी कोशी, बागमती र गण्डकी प्रदेशका पहाडी तथा हिमाली क्षेत्रमा आंशिक बादल लागेको छ । अन्य क्षेत्रमा भने मौसम सामान्यतया सफा रहने देखिएको छ ।
आज दिउँसो तराईका केही भूभागमा हुस्सु लाग्ने सम्भावना रहेकाले यातायात र जनजीवनमा केही प्रभाव पर्न सक्ने देखिएको छ । पहाडी र हिमाली भेगमा बादलको आवतजावत रहे पनि बाँकी स्थानहरूमा भने घाम लाग्ने महाशाखाको अनुमान छ । साँझपख र रातिको समयमा पनि कोशी र गण्डकी प्रदेशका पहाडी भूभागमा आंशिक बादल लाग्नेछ भने तराईका केही स्थानहरूमा तुवाँलो लाग्न सक्ने बताइएको छ ।
निर्वाचनको तयारीका लागि घर फर्किने र मतदानको तयारीमा जुटेका सर्वसाधारणलाई तराईको हुस्सु र पहाडको बदलीले केही सतर्क रहन सङ्केत गरेको छ । समग्रमा देशका अधिकांश स्थानको मौसम मुख्यतया सफा रहने भए तापनि चिसो र हुस्सुबाट बच्न आवश्यक उपाय अपनाउन मौसमविद्हरूले सुझाव दिएका छन् ।
