काठमाडौँ । कक्षा १२ को परीक्षाफलको शुद्धता सुनिश्चित गर्न सरकारले एउटा विशेष समिति बनाएको छ ।
शिक्षा तथा खेलकुद मन्त्री सस्मित पोखरेलका अनुसार परीक्षाको उत्तरपुस्तिका स्याम्पलिङ परीक्षण, परीक्षाङ्क र डेटा इन्ट्रीको पुनरावलोकन (भेरिफिकेसन) का लागि यो समिति गठन गरिएको हो । उक्त समितिमा शिक्षा तथा खेलकुद मन्त्रालय र पाठ्यक्रम विकास केन्द्रका उपसचिवहरूको प्रतिनिधित्व रहने जानकारी उनले दिए ।
हतारमा नतिजा सार्वजनिक गरिएका कारण त्रुटि भएको भन्ने आशंकालाई खण्डन गर्दै मन्त्री पोखरेलले समयमै परिणाम निकाल्न जनशक्ति थप गरिएको र प्रशासनिक झन्झट मात्र हटाइएको दाबी गरे । तोकिएकै समयमा नतिजा ल्याउन मन्त्रालयले व्यवस्थित रूपमा काम गरेको उनको भनाइ छ ।
यसै गरी , परीक्षाफललाई लिएर भइरहेको शान्तिपूर्ण आन्दोलनप्रति मन्त्रीले सकारात्मक दृष्टिकोण राखेका छन् । लोकतान्त्रिक व्यवस्थामा आफ्ना माग र आवाज राख्न पाउनु सबैको अधिकार भएको भन्दै उनले आन्दोलनकारीको भावनालाई सम्मान गर्ने बताए ।
सामाजिक सञ्जालमा विद्यार्थीहरूका विरुद्ध भइरहेका नकारात्मक र अपमानजनक टिप्पणीप्रति चासो व्यक्त गर्दै उनले आन्दोलनरत पक्षलाई लक्षित गरी दुर्व्यवहार वा गालीगलौज नगर्न समेत सबैलाई आग्रह गरेका छन् ।
