काठमाडौँ । जल तथा मौसम विज्ञान विभागको पूर्वानुमान अनुसार मुलुकभर मनसुनी प्रणालीको प्रभाव कायमै रहँदा अधिकांश भूभागमा बदली र वर्षाको सम्भावना देखिएको छ ।
हाल मनसुनको न्यून चापीय रेखा औसत स्थान आसपास अवस्थित रहेकाले देशका विभिन्न क्षेत्रको मौसम प्रभावित भएको हो ।
अहिले बागमती प्रदेशका केही स्थानका साथै कोशी, मधेस र लुम्बिनीका थोरै ठाउँमा मेघगर्जनसहित हल्का वर्षा भइरहेको छ । हिमाली तथा पहाडी भूभागमा सामान्य बदली रहँदा तराईका केही क्षेत्रमा भने आंशिक बदलीदेखि मौसम मुख्यतया सफा रहेको मौसम पूर्वानुमान महाशाखाले जनाएको छ ।
दिउँसो देशैभर मौसम साधारणतया बदली रहने अनुमान गरिएको छ । यस क्रममा कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका उच्च पहाडी तथा हिमाली भूभागका केही स्थानमा मध्यम वर्षाका साथै हिमपातको समेत सम्भावना रहेको छ ।
त्यस्तै, रातिको समयमा पनि देशका हिमाली तथा पहाडी भूभागमा मौसम बदली रही केही स्थानमा मध्यम वर्षा र हिमपात जारी रहनेछ । कोशी, बागमती, गण्डकी, लुम्बिनी, मधेस र सुदूरपश्चिम प्रदेशका तराई क्षेत्रमा मध्यम वर्षाको सम्भावना छ भने कर्णाली प्रदेशका पहाडी क्षेत्रका एक-दुई ठाउँमा भारी वर्षा हुनसक्ने पूर्वानुमान छ ।
