काठमाडौँ । चलचित्र विकास बोर्डले साउन ३१ गते आइतबारसम्मको बक्स अफिस कलेक्सन विवरण सार्वजनिक गरेको छ । बोर्डका अनुसार पछिल्लो समय प्रदर्शनमा आएका चलचित्रहरू ‘गौथली’, ‘हली’ र ‘कमला मिस’को व्यापारिक आँकडा बाहिर आएको हो ।
साउन १ गतेदेखि प्रदर्शनमा आएको चलचित्र ‘गौथली’ले प्रदर्शनको दोस्रो सातासम्म आइपुग्दा शानदार कमाइ दर्ज गरेको छ । यस चलचित्रले हालसम्म बक्स अफिसबाट २३ करोड ५५ लाख १२ हजार रुपैयाँ ग्रस कलेक्सन गरिसकेको छ । यो अवधिमा फिल्मका ८ लाख ५५ हजार ७५२ थान टिकट बिक्री भएका छन् ।
त्यस्तै साउन २२ गतेबाट एकसाथ प्रदर्शनमा आएका अन्य दुई चलचित्र ‘हली’ र ‘कमला मिस’को व्यापार भने सुस्त देखिएको छ । ‘हली’ले हालसम्म २१ लाख ७७ हजार रुपैयाँ कमाउँदै ७ हजार ७१० टिकट बिक्री गरेको छ ।
अर्कातर्फ, नीर शाहद्वारा निर्देशित चलचित्र ‘कमला मिस’ले २ लाख ६१ हजार ८४५ रुपैयाँ मात्र सङ्कलन गर्न सफल भएको छ, जसका जम्मा ७१८ टिकट बिक्री भएका छन् ।
