इटहरी । सुनसरीको इटहरीमा युवाहरूलाई लक्षित गर्दै आजदेखि ‘सीप तथा रोजगार मेला, २०८३’ सुरु हुँदैछ ।
प्राविधिक तथा व्यावहारिक सीपमार्फत युवाहरूलाई सीधै रोजगारदातासँग जोड्ने लक्ष्यका साथ युवा, श्रम तथा रोजगार मन्त्रालयले यो आयोजना अघि बढाएको हो ।
असोज २० गतेसम्म सञ्चालन हुने यस मेलाको उद्घाटन प्रतिनिधिसभाका सभामुख डोलप्रसाद अर्यालले गर्नेछन् । युवा, श्रम तथा रोजगारमन्त्री रामजी यादवको अध्यक्षतामा आयोजना हुने शुभारम्भ समारोहमा थारू समुदायको परम्परागत नृत्य र नौमती बाजासहितका विभिन्न सांस्कृतिक झाँकीहरू प्रदर्शन गरिने कार्यक्रम छ । उद्घाटन सत्रलगत्तै ‘आजको युवा, भोलिको उद्यमी : सार्क संवाद’ शीर्षकमा विशेष विचार-विमर्श आयोजना गरी युवाहरूलाई स्वरोजगार र उद्यमशीलतामा लाग्न प्रेरित गरिनेछ ।
मन्त्रालयका अनुसार युवाहरूमा रहेको सीपको पहिचान गरी उनीहरूलाई तालिम प्रदायक संस्था र सम्भावित रोजगारदातासँग एउटै मञ्चमा भेट गराउनु मेलाको मुख्य ध्येय हो । आयोजनाको पहिलो दिन दिउँसो १२ बजेदेखि साँझ ५ बजेसम्म सहभागीहरूको छनोट, समूह विभाजन, रोजगार मिलानका लागि बायोडाटा तथा सीप कार्ड तयार पार्ने, परामर्श सेवा दिने र सहभागी संस्थाहरूको परिचय गराउने काम हुनेछ ।
त्यस्तै, असोज १५ देखि १९ गतेसम्म विभिन्न १० वटा विषयगत क्षेत्रमा पाँचदिने व्यावहारिक तालिमहरू सञ्चालन गरिनेछन् । मेला अवधिभर रोजगारी सम्बन्धी परामर्श, सिफारिस, प्रदर्शनी कक्ष र उद्यमी बन्ने विषयमा निरन्तर छलफल तथा संवाद कार्यक्रमहरू जारी रहनेछन् ।
