काठमाडौँ । बीपी कोइराला स्वास्थ्य विज्ञान प्रतिष्ठान धरानले नयाँ पदाधिकारी पाएको छ । प्रतिष्ठानको रिक्त पदहरूमा शिक्षाध्यक्ष, रजिस्ट्रार र अस्पताल निर्देशकको नियुक्ति प्रक्रिया पूरा भई उनीहरूले जिम्मेवारी सम्हालेका हुन् ।
नयाँ नियुक्तिअनुसार शिक्षाध्यक्ष पदमा प्रा.डा. शिवेन्द्र झा, रजिस्ट्रारमा धरणीधर बराल र अस्पताल निर्देशकमा डा. इन्द्रकुमार लिम्बु चयन भएका छन् ।
नवनियुक्त पदाधिकारीहरूले स्वास्थ्य तथा खाद्य स्वच्छता मन्त्री निशा मेहतासमक्ष पद तथा गोपनीयताको शपथ ग्रहण गरिसकेका छन् ।
शपथ ग्रहणपछि उनीहरूले प्रतिष्ठानको समग्र शैक्षिक वातावरणमा सुधार ल्याउने, प्रशासनिक कार्यलाई चुस्त बनाउने र अस्पतालबाट प्रवाह हुने स्वास्थ्य सेवालाई थप गुणस्तरीय एवं प्रभावकारी बनाउन केन्द्रित रहने प्रतिबद्धता व्यक्त गरेका छन् ।
