काठमाडौँ । प्रधानमन्त्री दैवी प्रकोप राहत कोषमा रु. ११ अर्ब ९५ करोडभन्दा बढी रकम जम्मा भएको छ।
अर्थ मन्त्रालयका अनुसार कोषमा रहेका नौवटा नेपाली रुपैयाँ खातामा रु. ८ अर्ब ७६ करोड ६९ लाख र दुईवटा अमेरिकी डलर खातामा २ करोड ११ लाख ८ हजार ४७१ डलर मौज्दात रहेको छ ।
अमेरिकी डलरलाई प्रचलित विनिमय दरअनुसार रूपान्तरण गर्दा कोषको कुल मौज्दात ११ अर्ब ९५ करोड १७ लाख रुपैयाँ पुगेको हो । हालैको रसुवा–भोटेकोशी बाढीपहिरोपछि मात्रै कोषमा रु. ७ अर्ब ६८ करोडभन्दा बढी र २ करोड ५ लाखभन्दा बढी अमेरिकी डलर सङ्कलन भएको मन्त्रालयले जनाएको छ ।
यसअघि भदौ १६ गते राहत तथा उद्धार कार्यका लागि राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई १ अर्ब रुपैयाँ पठाइएको थियो । विपद्को यस घडीमा निरन्तर सहयोग पुर्याउने स्वदेशी तथा विदेशी सहयोगी दाताहरूप्रति अर्थ मन्त्रालयले धन्यवाद ज्ञापन गरेको छ ।
