काठमाडौँ । रसुवामा आएको विनाशकारी बाढीका कारण हालसम्म १,२९४ जनाको ज्यान गएको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले शुक्रबार आयोजना गरेको पत्रकार सम्मेलनमा सो संख्यामा शवहरू बरामद भएको तथ्य सार्वजनिक गरेको हो । प्राधिकरणका प्रवक्ता शान्ति महतका अनुसार विपद्मा परी ५,०५३ जना अझै बेपत्ता छन् भने हालसम्म १३,०९५ जनाको जीवितै उद्धार गरिएको छ ।
प्रवक्ता महतले रसुवा, नुवाकोट र धादिङका ३७ वटा होल्डिङ सेन्टरहरूमा अहिले ४,६२७ जना विस्थापितहरूले आश्रय लिइरहेको जानकारी दिए । प्रारम्भिक विवरण अनुसार बाढीले ७,५७० वटा घरहरू पूर्ण रूपमा ध्वस्त पारेको छ भने कुल ३२,९३३ नागरिक प्रत्यक्ष रूपमा प्रभावित बनेका छन् ।
भौतिक पूर्वाधारतर्फ ४८ वटा सरकारी कार्यालय, १८ वटा विद्यालय र ७ वटा स्वास्थ्य संस्थामा क्षति पुगेको छ । यसैगरी ५५ किलोमिटर सडक खण्ड पूर्ण रूपमा अवरुद्ध हुनाका साथै ३७ वटा मोटरेबल पुल र ६८ वटा झोलुङ्गे पुल बिग्रिएका छन् ।
कृषि क्षेत्रमा १,८०६ हेक्टर खेतीयोग्य जमिन बालुवाले पुरिएकाले वार्षिक ७,६८६ मेट्रिक टन खाद्यान्न उत्पादन घट्ने अनुमान छ । ऊर्जा क्षेत्रतर्फ ३ जलविद्युत् आयोजना, १ सोलार प्लान्ट र २ वटा प्रसारण लाइनमा क्षति पुग्दा ७८३ मेगावाट विद्युत् उत्पादन ठप्प भएको छ ।
