काठमाडौँ । सुरक्षण मुद्रणका क्षेत्रमा नेपाललाई आत्मनिर्भर बनाउँदै वैदेशिक बजारसम्म प्रतिस्पर्धा गर्न सकिने सम्भावनाबारे छलफल सुरु भएको छ ।
बिहीबार आयोजित विज्ञहरूसँगको अनुभव आदानप्रदान कार्यक्रमलाई सम्बोधन गर्दै सञ्चार तथा सूचना प्रविधिमन्त्री डा. विक्रम तिमिल्सिनाले सुरक्षण मुद्रण केन्द्रको व्यावसायिक क्षमता बढाउनुपर्ने धारणा राखे । राहदानी, राष्ट्रिय परिचयपत्र तथा राजस्वसम्बन्धी संवेदनशील कागजातहरू देशभित्रै उच्च गुणस्तरमा छपाई गर्न केन्द्रलाई आधुनिक प्रविधि र दक्ष जनशक्तिले सुसज्जित बनाउनुपर्ने उनको भनाइ थियो ।
कार्यक्रममा उपस्थित विज्ञहरूले नक्कली कागजातका कारण राज्य र सर्वसाधारणले भोग्नुपरेको जोखिम कम गर्न बहुस्तरीय सुरक्षा प्रणाली र आधुनिक प्रविधिको प्रयोग अपरिहार्य रहेको औंल्याए ।
साथै, सुरक्षण मुद्रणमा प्रयोग हुने अत्याधुनिक कागज, कार्ड र डिजिटल प्रविधिका पछिल्ला आयामबारे गहन छलफल भएको थियो ।
अन्तर्राष्ट्रिय सुरक्षा मापदण्डको पूर्ण पालना, गुणस्तर परीक्षण तथा प्रमाणीकरण गर्दै नेपाली उत्पादनलाई अन्तर्राष्ट्रिय बजारसम्म पुर्याउन सकिने सम्भावनाबारे पनि विज्ञहरूले आफ्ना अनुभव र सुझाव साटासाट गरेका थिए ।
