काठमाडौँ । संयुक्त राष्ट्रसङ्घले अक्टोबर १ तारिखलाई ज्येष्ठ नागरिकको सम्मान र अधिकारको प्रतीक मान्दै विशेष दिवस घोषणा गरेको ३५ वर्ष पूरा भएको छ ।
सन् १९९० डिसेम्बर १४ मा भएको सो निर्णयपछि विश्वभर आजको दिनलाई अन्तर्राष्ट्रिय ज्येष्ठ नागरिक दिवसका रूपमा मनाइँदै आइएको छ ।
यस वर्ष ‘दीर्घायुको युग : लामो जीवनका लागि प्रणालीमा पुनर्विचार’ भन्ने नाराका साथ ३६औँ अन्तर्राष्ट्रिय ज्येष्ठ नागरिक दिवस मनाइँदैछ ।
दिवसका अवसरमा महिला, बालबालिका तथा ज्येष्ठ नागरिक मन्त्रालय, विभिन्न प्रदेश सरकार, स्थानीय तहका साथै राष्ट्रिय ज्येष्ठ नागरिक महासङ्घ लगायत यस क्षेत्रमा सक्रिय सङ्घसंस्थाहरूले ज्येष्ठ नागरिकको हक, हित, संरक्षण र संवर्द्धनका लागि रचनात्मक तथा विविध सचेतनामूलक कार्यक्रमहरू सञ्चालन गरिरहेका छन् ।
