दैलेख । पश्चिम कर्णालीको दुर्गम भेगमा रहेको दैलेख जिल्ला अस्पतालले स्थानीय महिलाहरूलाई लक्षित गर्दै स्त्रीरोगसम्बन्धी विशेषज्ञ सेवा विस्तार गरेको छ ।
शुक्रबारबाट औपचारिक रूपमा सुरु गरिएको यस सेवाअन्तर्गत अब अस्पतालमा पाठेघरको शल्यक्रिया, स्तन क्यान्सरको परीक्षण तथा उपचार र आङ खस्ने (पाठेघर खस्ने) समस्याको जटिल उपचार उपलब्ध हुनेछ । यसका साथै १८ हप्तासम्मको सुरक्षित गर्भपतन सेवा र पाठेघरको मुखको क्यान्सर सुरुवाती चरणमै तातोले सेकेर निको पार्ने (थर्मल एब्लेसन) प्रविधिसमेत भित्र्याइएको छ ।
स्त्रीरोग विशेषज्ञ डा. जगत थापा (एमडी) अस्पतालमा हाजिर भएसँगै यी विशेषज्ञ सेवाहरू नियमित सञ्चालनमा आएको स्वास्थ्य सेवा कार्यालय दैलेखका प्रमुख डा. मनोज विश्वकर्माले जानकारी दिनुभयो । नयाँ सेवा थपिएसँगै अहिले दैनिक १० जनाभन्दा बढी महिलाहरू विशेषज्ञ परामर्श र उपचारका लागि अस्पताल पुग्न थालेका छन् ।
यसैबीच, स्वास्थ्य सेवा कार्यालयको प्रशासनिक नेतृत्व सम्हालेपछि डा. विश्वकर्माले संस्थागत सुधार र पारदर्शितामा जोड दिनुभएको छ । अस्पताल परिसरको फोहोर व्यवस्थापन, खानेपानीको प्रबन्ध, मर्मत सम्भार पर्खिरहेका प्रयोगशालाहरूको स्तरोन्नति र म्याद नाघेका औषधिको उचित व्यवस्थापन जस्ता कार्यहरू द्रुत गतिमा अघि बढाइएको उहाँले बताउनुभयो ।
