सुर्खेत । अविरल वर्षासँगै आएको विनाशकारी पहिरोले जाजरकोटमा ठूलो धनजनको क्षति पुर्याएको छ । भेरी नगरपालिका–२ रिसाङ क्षेत्रमा पहिरोले बस्तीमा रहेका घर तथा अस्थायी टहरा भत्काउँदा सात जना घाइते भएका छन् भने दुई जना सम्पर्कविहीन भएका छन् ।
सडक सञ्जाल पहिरोले अवरुद्ध बनाएपछि उद्धारका लागि सुरक्षाकर्मीको टोली पैदलै घटनास्थलतर्फ प्रस्थान गरेको छ । पहिरोका कारण भेरी नगरपालिका–३ स्यालाका पूर्णबहादुर विकको कच्ची घर तथा सोही वडाकी भैरवी केसीका दुईवटा टिनका अस्थायी टहरा पूर्ण रूपमा ध्वस्त भएका छन् ।
दुर्घटनामा घाइते भएकामध्ये भेरी नगरपालिका–२ रिसाङका ६० वर्षीय रामबहादुर शाही र सोही वडा चिसापानीकी ५७ वर्षीया भद्राकली कार्कीको अवस्था गम्भीर छ । शाहीलाई जिल्ला अस्पताल जाजरकोटमा प्रारम्भिक उपचारपछि थप उपचारका लागि नेपालगञ्ज पठाइएको छ भने कार्कीलाई सुर्खेत रिफर गरिएको छ ।
त्यसैगरी, ४५ वर्षीय सिद्धिबहादुर कामीको जिल्ला अस्पतालमा उपचार भइरहेको छ भने मनवीर चदरा (४५), मनिषा विक (१६), मोतीकला विक (४७) र केदार कार्की (५२) सामान्य घाइते भएका छन् ।
पहिरो आउने क्रममा भाग्ने प्रयास गर्दा भेरी नगरपालिका–२ फारुलाकी ५४ वर्षीया उमासिंह खत्री र चिसापानीका ७० वर्षीय भीमबहादुर कार्की बेपत्ता भएका छन् । घटनास्थलमा खटिएको नेपाल प्रहरीको टोलीले घाइतेहरूको उद्धार, बेपत्ताहरूको खोजी तथा क्षतिको थप विवरण सङ्कलन गरिरहेको छ ।
