काठमाडौँ । बढ्दो प्राकृतिक प्रकोप नियन्त्रण र वातावरणीय सन्तुलनका लागि जनचेतना जगाउने उद्देश्यका साथ आज देशभर राष्ट्रिय भू-संरक्षण दिवस मनाइँदै छ ।
नेपालमा बाढी, पहिरो तथा भू-क्षयजस्ता विपत्ति कम गर्दै भूमिको उर्वराशक्ति जोगाउन यो दिवसको विशेष महत्त्व रहँदै आएको छ ।
साउन २४ गते भू तथा जलाधार संरक्षण विभागको स्थापना भएको सम्झनामा विक्रम संवत् २०३१ देखि निरन्तर यो दिवस मनाउन थालिएको हो । दिवसको अवसर पारेर आज देशका विभिन्न भागमा सचेतनामूलक छलफल, अन्तर्क्रिया तथा वृक्षरोपण कार्यक्रमहरू आयोजना गरिँदै छ । विगतका वर्षहरूमा जस्तै यस वर्ष पनि धुपी, काइयो तथा विभिन्न जातका बोटबिरुवा रोपेर प्राकृतिक वातावरण जोगाउने सन्देश दिन लागिएको हो ।
नेपालको संवेदनशील भौगोलिक बनावट र जलवायु परिवर्तनका कारण भू-क्षय तथा विपद्को जोखिम उच्च छ । यस्ता मानव सिर्जित तथा प्राकृतिक प्रकोपबाट हुने धनजनको क्षति न्यूनीकरण गर्न र वातावरणीय सन्तुलन कायम राख्न जलाधार क्षेत्रको निरन्तर संरक्षण आवश्यक मानिन्छ ।
