काठमाडौँ । लाहुरे समाजको बाहिरी चमकधमक र प्रतिष्ठा पछाडि लुकेको पारिवारिक जटिलता एवम् भावनात्मक कथावस्तुमा आधारित चलचित्र ‘पेन्सन पट्टा’ को आधिकारिक ट्रेलर सार्वजनिक भएको छ ।
माओत्से गुरुङको निर्देशनमा बनेको यो चलचित्र आगामी भदौ २६ गतेदेखि देशभरका सिनेमाघरमा प्रदर्शनमा आउँदैछ । मुख्य भूमिकामा देखिएका अभिनेता दयाहाङ राईले लाहुरे जीवनशैलीका आन्तरिक उतारचढाव र सामाजिक सम्बन्धका आयामलाई जीवन्त रूपमा प्रस्तुत गरेका छन् ।
यस चलचित्रमा दयाहाङका साथै गौमाया गुरुङ, विल्सन विक्रम राई, बुद्धि तामाङ, पशुपति राई, विश्वास गुरुङ, माया गुरुङ, पुष्कर बहादुर गुरुङ, स्वर्गीय सुनील थापासहितका कलाकारहरूको अभिनय रहेको छ ।
मीन कोन्मे गुरुङ (सिकलेस), भोज बहादुर गुरुङ (यूके), माया गुरुङ र सपना गुरुङले संयुक्त रूपमा निर्माण गरेको यो चलचित्रको छायांकन सुशन प्रजापतिले गरेका हुन् । सुरज तामु र केर डी. कोइन्च लिनुचको सह-लेखन, मनोज थापा मगर, शिव बराइली र सुरज तामुको संगीत तथा निमेश श्रेष्ठ र केर डी. कोइन्च लिनुचको सम्पादन चलचित्रमा समेटिएको छ ।
