काठमाडौँ । उत्तरी तिब्बतको नाग्छु क्षेत्रलाई केन्द्रविन्दु बनाएर गएको शक्तिशाली भूकम्पमा परी कम्तीमा १६ जनाको ज्यान गएको छ भने ३२ जना घाइते भएका छन् । बिहीबार राति समुद्री सतहबाट करिब ४ हजार ८६४ मिटरको उचाइमा रहेको कम जनघनत्व भएको उच्च हिमाली जिल्लामा ७ म्याग्निच्युडको भूकम्प गएको हो ।
चिनियाँ भूकम्प सञ्जाल केन्द्रका अनुसार जमिनको सतहबाट करिब १० किलोमिटर गहिराइमा भूकम्पको केन्द्रविन्दु रहेको थियो । भूकम्पको धक्का तिब्बतको राजधानी ल्हासाबाट करिब ४०० किलोमिटर टाढासम्म स्पष्ट रूपमा महसुस गरिएको थियो । भूकम्पपछि ३ देखि ४ म्याग्निच्युडका साना-ठूला परकम्पहरू समेत लगातार गइरहेका छन् ।
भूकम्पका कारण घरहरूमा चिरा परेका छन् भने कतिपय संरचनाहरूमा क्षति पुगेको छ । त्रासका कारण स्थानीय बासिन्दाहरू घर छाडेर खुला ठाउँ तथा सडकमा खडा गरिएका गाडीहरूमा रात बिताउन बाध्य भएका छन् । घटनालगत्तै प्रभावित क्षेत्रमा उद्धारकर्मी तथा अग्नि नियन्त्रकहरूको टोली परिचालन गरी खोजी र उद्धार कार्य तीव्र पारिएको छ । सन् २०२४ जनवरीयता चीनमा गएको यो नै सबैभन्दा ठूलो र शक्तिशाली भूकम्प हो ।
