काठमाडौँ । साताको अन्तिम कारोबार दिन बिहीबार शेयर बजार परिसूचक नेप्सेमा दोहोरो अङ्कको वृद्धि नदेखिए पनि झिनो अङ्कले सुधार आएर २५९९.१५ को विन्दुमा पुगी कारोबार बन्द भएको छ ।
अघिल्लो दिनको तुलनामा ०.२६ अङ्कको यो सुधारले बजारमा स्थिरतातर्फको सङ्केत गरेको छ ।
कारोबार रकमका हिसाबले आज ३५३ कम्पनीका १ करोड २० लाख ६५ हजार ५५५ कित्ता शेयर खरिदबिक्री हुँदा कुल ४ अर्ब ८९ करोड १८ लाख ७६ हजार ३२५ रुपैयाँ बराबरको कारोबार भएको छ । उपसमूहतर्फ बैंकिङ, विकास बैंक, फाइनान्स र हाइड्रोपावर क्षेत्रमा हरियाली छाए पनि बाँकी सबै समूहका सूचकमा भने गिरावट दर्ता भएको छ ।
आजको कारोबारमा सिन्धु विकास बैंकका शेयरधनीले सर्वाधिक १०.११ प्रतिशत नाफा कमाएका छन् भने कर्पोरेट विकास बैंकको शेयर मूल्य ९.३५ प्रतिशतले बढेको छ । अर्कातिर, सयपत्री हाइड्रोका लगानीकर्ताले सबैभन्दा धेरै ९.६६ प्रतिशतको क्षति व्यहोरेका छन् । एकल कम्पनीको कारोबारका आधारमा सिद्धार्थ बैंक ३० करोड ५३ लाख रुपैयाँसहित अग्रस्थानमा रह्यो भने अपि पावर २२ करोड ८१ लाख रुपैयाँको कारोबारसहित दोस्रो स्थानमा रह्यो ।
