काठमाडौँ । आज देशका अधिकांश भूभागमा पश्चिमी वायुको सामान्य प्रभाव देखिएको छ भने पहाडी तथा हिमाली क्षेत्रमा मौसम सामान्यतया सफा रहँदा बिहानको समयमा तराईका केही स्थानमा हुस्सु तथा कुहिरो लागेको मौसम विभागले जनाएको छ ।
जल तथा मौसम विज्ञान विभागअन्तर्गत मौसम पूर्वानुमान महाशाखाका अनुसार आज दिउँसो कोशी र गण्डकी प्रदेशका उच्च पहाडी तथा हिमाली भूभागका एक-दुई स्थानमा हल्का वर्षा र हिमपातको सम्भावना रहेको छ ।
त्यस्तै, आज राति कोशी, बागमती, गण्डकी र कर्णाली प्रदेशका हिमाली भूभागमा आंशिक बादल लाग्नेछ भने देशका बाँकी भूभागमा मौसम मुख्यतया सफा रहनेछ । तराई क्षेत्रमा बिहानपख हुस्सु तथा कुहिरोको प्रभाव दोहोरिन सक्ने महाशाखाले जानकारी दिएको छ ।
