ठूला सामुदायिक विद्यालयको रूप फेर्न ६ अर्ब ५४ करोडको योजना, पहिलो चरणमा ८९ विद्यालय छनोट

काठमाडौँ । देशभरका ठूला सामुदायिक विद्यालयको भौतिक अवस्था सुधार्न सरकारले बृहत् पूर्वाधार विकास योजना सुरु गरेको छ । दुई हजारभन्दा बढी विद्यार्थी अध्ययनरत विद्यालयलाई लक्षित गर्दै शिक्षा तथा खेलकुद मन्त्रालयले ६ अर्ब ५४ करोड रुपैयाँ बजेटको आयोजना अघि बढाएको हो ।

कुल १०९ वटा विद्यालय समेटिने यस योजनाको पहिलो चरणअन्तर्गत ८९ वटा शिक्षण संस्था छनोटमा परेका छन् । मन्त्रालयले यी विद्यालयका लागि ५ अर्ब ३४ करोड रुपैयाँसमेत निकासा गरिसकेको छ ।

शिक्षा तथा खेलकुदमन्त्री सस्मित पोखरेलका अनुसार छनोट भएका प्रत्येक विद्यालयमा औसत ६ करोड रुपैयाँको लागतमा १२ कोठा समेटिएको तीनतले आधुनिक भवन बनाइनेछ । नयाँ बन्ने भवनभित्र आधुनिक कक्षाकोठाका साथै व्यवस्थित प्रयोगशाला र पुस्तकालयको समेत सुविधा रहनेछ । यस पूर्वाधार विकासले साना र साँघुरा भवनमा पढ्न बाध्य विद्यार्थीका लागि सुरक्षित र प्रभावकारी सिकाइ वातावरण तयार हुने विश्वास मन्त्री पोखरेलको छ ।

प्राथमिकताका आधारमा बजेट विनियोजन गर्दा मधेश प्रदेशका सबैभन्दा धेरै ३३ वटा विद्यालय परेका छन् । यस्तै लुम्बिनीका २१ र कोशीका १८ वटा विद्यालय छनोट भएका छन् । गण्डकी र सुदूरपश्चिमबाट ६–६, कर्णालीका तीन र बागमतीका दुई वटा विद्यालय यस सूचीमा समेटिएका छन् ।

विशेषगरी मधेशका विद्यालयमा रहेको पूर्वाधारको अभाव हटाउन मन्त्रालयले मुख्य जोड दिएको छ । जिल्लागत आधारमा हेर्दा रुपन्देहीका आठ, दाङका छ तथा झापा र मोरङका छ–छ वटा विद्यालयले यो सुविधा पाउनेछन् । प्रथम चरणमा छानिएका विद्यालयको प्रदेश तथा जिल्लाअनुसारको विवरण मन्त्रालयले सार्वजनिक गरिसकेको छ ।