काठमाडौँ । बाढीबाट प्रभावित नुवाकोट र रसुवाका बालबालिकालाई लक्षित गरी ५ हजार थान सौर्य बत्ती सहयोग उपलब्ध गराइएको छ ।
चाइना फाउन्डेसन फर रुरल डेभलपमेन्टले फक्सकन इन्डस्ट्रियल इन्टरनेटको साझेदारीमा दुवै जिल्लाका ५४ वटा विद्यालयमार्फत उक्त बत्तीहरू हस्तान्तरण गरेको हो ।
विपद्का कारण नियमित विद्युत् आपूर्ति नभएका र उज्यालोको अभाव झेलिरहेका परिवारका विद्यार्थीलाई साँझको समयमा अध्ययन गर्न सहज बनाउने उद्देश्यले यो कार्यक्रम चलाइएको हो ।
कुल वितरण गरिएका बत्तीमध्ये नुवाकोटमा २ हजार ९६ थान र रसुवामा २ हजार ९०४ थान पठाइएको छ । नुवाकोटको सूर्यगढी गाउँपालिकामा १ हजार १०० तथा विदुर नगरपालिकामा ९९६ थान बत्ती बाँडिएको छ । यस्तै रसुवाको नौकुण्ड गाउँपालिकाका विद्यार्थीले १ हजार ५३४ र कालिका गाउँपालिकाका विद्यार्थीले १ हजार ३७० थान सौर्य बत्ती पाएका छन् ।
विद्यालयका प्रधानाध्यापक, शिक्षक र स्थानीय प्रतिनिधिहरूसँगको सहकार्यमा वितरण सम्पन्न गरिएको यस सहयोगले बालबालिकालाई गृहकार्य गर्न र परीक्षाको तयारीमा टेवा पुग्ने आशा लिइएको छ ।
