नेपाली कांग्रेसको १५औँ महाधिवेशनको मतदान बिहीबार बिहान १० बजेदेखि हुने

काठमाडौँ । नेपाली कांग्रेसको नयाँ नेतृत्व चयनका लागि १५औँ महाधिवेशन अन्तर्गतको मतदान प्रक्रिया बिहीबार बिहान १० बजेबाट सुरु हुने भएको छ ।

प्रतिकूल मौसम र प्राविधिक तयारीका कारण यसअघि बिहान ७ बजेका लागि तोकिएको समय केही घन्टा पछाडि सारिएको हो ।

पार्टीको केन्द्रीय निर्वाचन समितिका संयोजक वरिष्ठ अधिवक्ता प्रेमबहादुर खड्काका अनुसार प्रतिनिधिहरूलाई सहज रूपमा भोट हाल्ने व्यवस्था मिलाउन काठमाडौँका तीन स्थानमा सातवटा मतदान केन्द्र स्थापना गरिएका छन् । बागमती प्रदेशका प्रतिनिधिहरूले राष्ट्रिय सभागृहबाट मतदान गर्नेछन् भने गण्डकी र लुम्बिनी प्रदेशका प्रतिनिधिहरूका लागि प्रज्ञा भवनमा केन्द्र तोकिएको छ । यस्तै कोशी, मधेस, कर्णाली र सुदूरपश्चिम प्रदेशका साथै भ्रातृ, शुभेच्छुक संस्था र जनसम्पर्क समितिका प्रतिनिधिहरूले खुलामञ्चमा पुगेर मत खसाल्नुपर्नेछ ।

निर्वाचन समितिले परिचयपत्र र नामावली रुजु गरेपछि मात्रै मतदान कक्षमा प्रवेश दिने जनाएको छ । यस महाधिवेशनमा भाग लिन आएका कुल ७ हजार २५५ जना प्रतिनिधिले कांग्रेसको आगामी केन्द्रीय कार्यसमिति चुन्ने छन् ।