काठमाडौँ । संयुक्त राष्ट्रसङ्घको आह्वानमा आज विश्वभर ‘विश्व विकास सूचना दिवस’ मनाइँदै छ। सन् १९७२ मा राष्ट्रसङ्घको साधारण सभाले निर्णय गरेयता हरेक वर्ष अक्टोबर २४ का दिन यो दिवस मनाउने गरिएको हो ।
सूचना तथा सञ्चार प्रविधिको विकास र विस्तारले विश्वव्यापीकरणका चुनौतीहरूलाई सम्बोधन गर्न नयाँ अवसर सिर्जना गरेको छ। विशेषगरी आर्थिक वृद्धि, स्वच्छ प्रतिस्पर्धा, सूचना र ज्ञानमा सर्वसाधारणको पहुँच, गरिबी निवारण तथा सामाजिक समावेशीकरणलाई प्रवर्धन गर्ने मूल उद्देश्यका साथ यो दिवसको आयोजना गरिन्छ।
विकासका समस्या र चुनौतीप्रति खासगरी युवा वर्गमा सचेतना अभिवृद्धि गर्न सूचनाको सहज प्रवाह र गतिशीलताले महत्त्वपूर्ण भूमिका खेल्ने राष्ट्रसङ्घको विश्वास छ। यसका साथै दिवसले विकासका साझेदारहरूबीच अन्तर्राष्ट्रिय सहयोग, सहकार्य र सामूहिक प्रयासलाई थप मजबुत बनाउन योगदान पुर्याउने अपेक्षा राखिएको छ ।
