काठमाडौँ । शीतल निवासमा सोमबार आयोजित एक समारोहका बीच राष्ट्रपति रामचन्द्र पौडेलले भारतीय स्थल सेनाध्यक्ष जनरल धिरज सेठलाई नेपाली सेनाको मानार्थ महारथीको उपाधि तथा दर्ज्यानी चिह्न प्रदान गर्नुभएको छ ।
चार दिने औपचारिक भ्रमणका क्रममा आइतबार अपराह्न काठमाडौँ आइपुग्नुभएका सेनाध्यक्ष सेठलाई परम्परा अनुसार उक्त सम्मान दिइएको हो ।
छिमेकी मुलुक नेपाल र भारतका सेना प्रमुखहरूलाई एकअर्काको देशमा मानार्थ महारथीको दर्जा प्रदान गर्ने परम्परा सन् १९५० देखि निरन्तर चल्दै आएको छ । यसै परम्परा अन्तर्गत नेपालका वर्तमान प्रधानसेनापति अशोकराज सिग्देलले पनि गत २०२४ डिसेम्बरमा भारतीय राष्ट्रपति द्रौपदी मुर्मुबाट भारतीय सेनाको मानार्थ महारथीको दर्ज्यानी चिह्न ग्रहण गर्नुभएको थियो ।
भारतीय सरकारले जनरल सेठलाई गत ३० जुन २०२६ मा आफ्नो देशको ३१ औँ सेना प्रमुखका रूपमा नियुक्त गरेको थियो ।
