काठमाडौँ । धार्मिक आस्था वा विचारका कारण हिंसा भोग्न बाध्य पारिएका व्यक्तिहरूको पीडा र स्मृतिलाई सम्मान गर्दै हरेक वर्ष अगस्ट २२ तारिखमा अन्तर्राष्ट्रिय दिवस मनाउने गरिन्छ ।
यस्ता घटनाबाट प्रभावित व्यक्ति र उनीहरूका परिवारलाई आवश्यक राहत, न्याय र सहायता उपलब्ध गराउन संसारभर ध्यान आकर्षण गराउने ध्येयका साथ यो दिवस तय गरिएको हो ।
विचार, अभिव्यक्ति, शान्तिपूर्ण भेला र सङ्गठन निर्माणजस्ता मौलिक अधिकारहरू एक-अर्कासँग अभिन्न रूपमा जोडिएका हुन्छन् । मानव अधिकारको विश्वव्यापी घोषणापत्रले समेत सुनिश्चित गरेका यी अधिकारको सही संरक्षण हुन सकेमा समाजमा देखिने धार्मिक असहिष्णुता, विभेद र घृणास्पद व्यवहारमा कमी आउने अपेक्षा गरिन्छ । स्थानीय स्तरदेखि अन्तर्राष्ट्रिय तहसम्म विभिन्न संस्कृति र आस्थाबीच निरन्तर संवाद, खुला छलफल र सम्मानजनक आदानप्रदान हुनसके हिंसात्मक गतिविधि नियन्त्रण गर्न ठूलो मद्दत पुग्छ ।
विश्वका अनेकौँ भूभागमा अझै पनि धार्मिक अल्पसङ्ख्यक तथा विभिन्न आस्था राख्ने समूहमाथि आक्रमण र विभेदका शृङ्खला रोकिएका छैनन् । यस्ता अमानवीय घटना र तिनको बढ्दो रूपप्रति संयुक्त राष्ट्रसङ्घले निरन्तर चासो र चिन्ता प्रकट गर्दै आएको छ । धर्म वा आस्थाको आडमा व्यक्ति तथा समुदायमाथि गरिने आतङ्कवादी क्रियाकलापको कडा शब्दमा भर्त्सना गर्दै राष्ट्रसङ्घीय महासभाले सन् २०१९ मा विशेष प्रस्ताव पारित गरेको थियो, जसकै आधारमा अगस्ट २२ लाई यो दिवसका रूपमा स्थापना गरिएको हो ।
कुनै पनि प्रकारको आतङ्कवाद वा हिंसात्मक अतिवादलाई कुनै निश्चित धर्म, जाति, राष्ट्रियता वा सभ्यतासँग जोडेर हेर्न नहुनेमा राष्ट्रसङ्घको जोड छ । धार्मिक स्थल, व्यक्तिगत सम्पत्ति, विद्यालय वा सांस्कृतिक केन्द्रमाथि हुने आक्रमणहरू अन्तर्राष्ट्रिय कानुनको ठाडो उल्लङ्घन हुन् । प्रत्येक नागरिकले आफ्नो धर्म वा आस्था निसङ्कोच र स्वतन्त्र रूपमा अभ्यास गर्न पाउने वातावरण बनाउनु र मानव अधिकारको रक्षा गर्नु सम्बन्धित राज्यको प्राथमिक दायित्व हो ।
