काठमाडौँ । राष्ट्रिय स्वतन्त्र पार्टी (रास्वपा) को केन्द्रीय समिति सदस्यहरूका लागि आयोजित दुई दिने प्रशिक्षण कार्यशाला आज समापन हुँदैछ ।
बुढानिलकण्ठस्थित पार्क भिलेज रिसोर्टमा शनिबारदेखि सञ्चालन भइरहेको ‘नीति, संगठन र नेतृत्व’ विषयक पहिलो शृंखलाको कार्यशाला आज सकिन लागेको हो ।
कार्यक्रमको अन्तिम दिन आज पार्टीको सांगठनिक ढाँचा, मिडिया तथा सोसल मिडियाको प्रभावकारी प्रयोग, राजनीतिमा आर्टिफिसियल इन्टेलिजेन्स (एआई) को उपयोग र २१औँ शताब्दी अनुकूलको राजनीतिक दल निर्माणका विषयमा विषयविज्ञहरूले प्रस्तुति दिइरहेका छन् । अनिल चित्रकार, प्रमोद न्यौपाने र आनन्द मिश्रले कार्यशालाको सहजीकरण गरिरहेका छन् ।
यसअघि शनिबार पहिलो दिन अर्थमन्त्री डा. स्वर्णिम वाग्लेले पार्टीको प्रस्तावना र सामाजिक लोकतन्त्रका आधारहरूबारे धारणा राखेका थिए ।
त्यसैगरी महामन्त्री विपिन आचार्यले दलको आधारभूत मूल्य-मान्यता र आगामी स्थानीय तह निर्वाचनका लागि उम्मेदवार चयनको रूपरेखा प्रस्तुत गरेका थिए । कार्यशालामा वैज्ञानिक बजेट निर्माण प्रक्रिया तथा सरकार र पार्टीबीचको अन्तरसम्बन्धबारे पनि छलफल भएको थियो ।
आजै साँझ समापन सत्रमा पार्टी सभापति रवि लामिछानेले मार्गदर्शनसहितको सम्बोधन गर्ने कार्यक्रम रहेको छ ।
