काठमाडौँ । इजरायलमा सम्पन्न संसदीय निर्वाचनको मतपरिणाम आउने क्रम सुरु भएको छ ।
निर्वाचन आयोगका अनुसार यसपटक ७७.७ प्रतिशत मतदाताले सहभागिता जनाएका छन्, जुन सन् १९९९ पछिकै सबैभन्दा उच्च मतदान हो । मतदान सम्पन्न भएलगत्तै सार्वजनिक भएका ‘एग्जिट पोल’हरूले पूर्वसैन्य प्रमुख गादी आइसेनकोट नेतृत्वको गठबन्धन अगाडि देखिए पनि स्पष्ट बहुमत प्राप्त गर्न नसक्ने देखाएका छन् । अर्कोतर्फ, वर्तमान प्रधानमन्त्री बेन्जामिन नेतान्याहुको लिकुड पार्टी भने संसद्मा सबैभन्दा ठूलो एकल दलका रूपमा उभिने प्रारम्भिक अनुमान छ ।
प्रारम्भिक मत सर्वेक्षणहरूमा नेतान्याहु र आइसेनकोट पक्षबीच तीव्र प्रतिस्पर्धा देखिएको छ । केही सर्वेक्षणले दुवै पक्षले समान ५१-५१ सिट पाउने देखाएका छन् भने केहीले नेतान्याहुको पक्षलाई ५२ र आइसेनकोटको पक्षलाई ५० सिट मिल्ने प्रक्षेपण गरेका छन् । कुल १२० सदस्यीय इजरायली संसद्मा बहुमतका लागि ६१ सिट आवश्यक पर्ने भएकाले दुवै पक्षलाई सरकार निर्माणका लागि साना दलहरूको सहारा अनिवार्य हुनेछ ।
यस निर्वाचनमा अरब समुदायका दलहरूले हासिल गर्न सक्ने सफलतालाई चासोका साथ हेरिएको छ । संयुक्त अरब सूची र संयुक्त सूचीले कुल १९ सिटसम्म जित्न सक्ने अनुमान गरिएको छ । विगतमा मुख्य राजनीतिक दलहरू अरब समूहका दलहरूलाई सरकारमा समेट्न हिचकिचाउने गरे पनि यसपटकको पेचिलो प्रतिस्पर्धाले उनीहरूको भूमिकालाई निर्णायक बनाउने विश्लेषण गरिएको छ । हाल देशभर मतगणना कार्य तीव्र गतिमा अघि बढिरहेको छ ।
