काठमाडौँ । संघीय संसदको संयुक्त बैठकमा आज नयाँ आर्थिक वर्षको आयव्ययको विवरण प्रस्तुत गरिँदैछ ।
प्रत्येक वर्षको जेठ १५ गते बजेट सार्वजनिक गर्नुपर्ने नेपालको संवैधानिक बाध्यता अनुरूप सरकारले यसको तयारी पूरा गरेको हो ।
यस विशेष प्रयोजनका लागि प्रतिनिधिसभा र राष्ट्रिय सभाको संयुक्त बैठक आज दिउँसो ४ बजे डाकिएको छ । संघीय संसद सचिवालयका अनुसार सोही बैठकमा अर्थमन्त्री डा. स्वर्णीम वाग्लेले आगामी आर्थिक वर्षको बजेट पेश गर्ने कार्यसूची तय भएको छ ।
यसअघि गत वर्ष तत्कालीन अर्थमन्त्री विष्णु पौडेलले आर्थिक वर्ष २०८२/०८३ का लागि कुल १९ खर्ब ६४ अर्ब ११ करोड रुपैयाँको बजेट प्रस्तुत गरेका थिए ।
उक्त बजेटमा चालुतर्फ ११ खर्ब ८० अर्ब ९८ करोड (६०.१ प्रतिशत), पुँजीगततर्फ ४ खर्ब ७ अर्ब ८९ करोड (२०.८ प्रतिशत) र वित्तीय व्यवस्थापनतर्फ ३ खर्ब ७५ अर्ब २४ करोड (१९.१ प्रतिशत) रकम विनियोजन गरिएको थियो ।
