म्याग्दी । बेनी-जोमसोम सडकखण्ड अन्तर्गत अन्नपूर्ण गाउँपालिका-६ महभिरमा पहिरोले गाडी पुरिँदा एक जना चालकको ज्यान गएको छ ।
बुधबार राति करिब ८ बजेको समयमा माथिबाट खसेको ढुङ्गासहितको लेदोले सडकमा गुडिरहेको नम्बर नखुलेको इभी गाडीलाई पुरेको हो । दुर्घटनामा परी पर्साको वीरगञ्ज महानगरपालिका-२१ का २३ वर्षीय सोहेल मियाको मृत्यु भएको प्रहरीले जनाएको छ ।
घटना लगतै जिल्ला प्रहरी कार्यालय म्याग्दी र गुल्म हेक्वा म्याग्दीबाट सशस्त्र प्रहरीसहितको संयुक्त टोली उद्धारका लागि घटनास्थल पुगेको थियो । उद्धार टोलीले पहिरोमा पुरिएको गाडीबाट चालक मियालाई निकालेर तत्काल उपचारका लागि बेनीस्थित प्रदेश अस्पताल पुर्याएका थिए । अस्पताल पुर्याउनासाथ चिकित्सकले उनलाई मृत घोषणा गरेका थिए ।
पहिरोका कारण उक्त सडकखण्ड अहिले पूर्ण रूपमा ठप्प बनेको छ । अवरुद्ध सडक पन्छाएर यातायात सञ्चालनमा ल्याउने प्रयास भइरहेको सुरक्षा निकायले जनाएको छ ।
