काठमाडौँ । सङ्घीय संसदअन्तर्गत प्रतिनिधि सभाका विभिन्न तीन वटा विषयगत समितिका बैठकहरू आज एकैसाथ बस्दैछन् ।
संसदीय कार्यसूची अनुसार अन्तर्राष्ट्रिय सम्बन्ध तथा पर्यटन समिति, कानुन, न्याय तथा मानव अधिकार समिति र पूर्वाधार विकास समितिको बैठक आज आयोजना गरिएको हो ।
अन्तर्राष्ट्रिय सम्बन्ध र पर्यटन समितिको बैठक बिहान साढे १० बजे बोलाइएको छ । उक्त बैठकमा प्रस्तावित ‘पर्यटन विधेयक, २०८१’ का विविध पक्षमा सम्बन्धित क्षेत्रका विज्ञहरूसँग आवश्यक परामर्श र छलफल गर्ने कार्यसूची तय गरिएको छ ।
त्यसैगरी, बिहान १० बजे बस्ने कानुन, न्याय तथा मानव अधिकार समितिको बैठकमा देशभरका विभिन्न कारागार तथा हिरासतमा रहेका कैदीबन्दीहरूको मानव अधिकारको स्थितिबारे तयार पारिएको अध्ययन उपसमितिको प्रतिवेदन पेस गरिनेछ । सो प्रतिवेदनमाथि छलफल गर्नुका साथै बैठकले नयाँ उपसमिति गठनको विषयमा पनि निर्णय लिने बताइएको छ ।
उता पूर्वाधार विकास समितिको बैठक पनि बिहान १० बजे नै सुरु हुनेछ । विद्युतका पोल र वितरण लाइन समयमै व्यवस्थापन हुन नसक्दा सडक निर्माण कार्यमा ढिलासुस्ती भएको विषयमा समितिले ऊर्जा, जलस्रोत तथा सिँचाइमन्त्री र मन्त्रालयका सचिवसँग प्रत्यक्ष छलफल गर्ने कार्यसूची रहेको छ ।
