काठमाण्डौ । विगत लामो समयदेखि उत्पादन ठप्प रहेको हेटौँडा कपडा उद्योगलाई पुनर्जीवन दिन सरकारले गृहकार्य तीव्र पारेको छ । सरकारी निकायहरूले उद्योगको स्थलगत निरीक्षण गर्दै पुनः सञ्चालनको सम्भाव्यता अध्ययन गर्न थालेका हुन् ।
औद्योगिक क्षेत्र व्यवस्थापन लिमिटेड हेटौँडा कार्यालयका सूचना अधिकारी हिमालय भण्डारीका अनुसार यस पटक सरकारले उद्योग ब्युँताउन विशेष चासो देखाएसँगै सरकारी संयन्त्रहरू सक्रिय भएका छन् । विक्रम संवत २०३२ सालमा हेटौँडा औद्योगिक क्षेत्रभित्र स्थापना भई २०३५ सालदेखि व्यावसायिक उत्पादन सुरु गरेको यो उद्योग २०५७ सालमा आइपुग्दा पूर्ण रूपमा बन्द हुन पुगेको थियो । त्यसयता उद्योगलाई फेरि सञ्चालनमा ल्याउन विभिन्न समयमा प्रयासहरू गरिए पनि ती सबै निरर्थक साबित भएका थिए ।
उद्योगमा रहेका मेसिन तथा उपकरणहरू सामान्य मर्मतसम्भार गरेर तत्कालै प्रयोगमा ल्याउन सकिने अवस्थामा रहेको सूचना अधिकारी भण्डारीले स्पष्ट पार्नुभयो । यस पटक उद्योग पुनः सञ्चालनका लागि प्रधानमन्त्री तथा मन्त्रिपरिषद्को कार्यालयले नै विशेष अग्रसरता लिएको छ । यसै सिलसिलामा उद्योग, वाणिज्य तथा आपूर्तिमन्त्री गौरीकुमारी यादव, हेटौँडा उपमहानगरपालिकाका प्रमुख मीनाकुमारी लामा र मकवानपुरका प्रमुख जिल्ला अधिकारीसहितको टोलीले उद्योग परिसरको स्थलगत अनुगमन गरी वस्तुस्थितिबारे जानकारी लिइसकेका छन् ।
उद्योग मन्त्री यादवले आगामी आर्थिक वर्ष २०८३/८४ को वार्षिक बजेटमाथि प्रतिनिधिसभामा सांसदहरूले उठाएका प्रश्नहरूको उत्तर दिने क्रममा चालु वर्षभित्रै हेटौँडा कपडा उद्योगलाई सञ्चालनमा ल्याइने प्रतिबद्धता व्यक्त गर्नुभएको थियो । यो ऐतिहासिक उद्योग पूर्ण रूपमा बन्द भएपछि विगत २०७५ सालदेखि यसको परिसरमा सशस्त्र प्रहरी बलको १४ नम्बर गण बस्दै आएको छ ।
