खोटाङ । खोटाङमा ज्यालाको विषयलाई लिएर भएको विवादमा एक व्यक्तिको धारिलो हतियार प्रहार गरी हत्या भएको छ ।
दिप्रुङ चुइचुम्मा गाउँपालिका–१ मा आफूले काम गरेको रकम माग्न गएका स्थानीय ३८ वर्षीय भक्तबहादुर अधिकारी (ध्रुव) को खुकुरी प्रहारबाट घटनास्थलमै मृत्यु भएको हो । जिल्ला प्रहरी कार्यालय खोटाङका अनुसार असार २५ गते दिउँसो करिब १२ बजे अधिकारी स्थानीय ५७ वर्षीय तिलबहादुर सार्कीको घरमा पैसा माग्न पुगेका थिए । सोही क्रममा विवाद हुँदा तिलबहादुर लगायतको समूहले उनीमाथि खुकुरी प्रहार गरेको प्रहरीले जनाएको छ ।
उक्त घटनामा संलग्न रहेको आरोपमा प्रहरीले तीन जनालाई नियन्त्रणमा लिएको छ । मुख्य आरोपी तिलबहादुर सार्कीलाई घटना भएकै दिन असार २५ गते पक्राउ गरिएको थियो । अनुसन्धानकै क्रममा प्रहरीले असार २६ गते थप दुई जना ५२ वर्षीया भोटीमाया सार्की र २२ वर्षीया सीता सार्कीलाई पनि हिरासतमा लिएको छ ।
पक्राउ परेका तीनै जना विरुद्ध कर्तव्य ज्यानसम्बन्धी कसुरमा कानुनी प्रक्रिया अगाडि बढाई थप अनुसन्धान भइरहेको जिल्ला प्रहरी कार्यालय खोटाङले उल्लेख गरेको छ ।
