काठमाडौँ । नेकपा (एमाले)का उपाध्यक्ष एवं पूर्वअर्थमन्त्री विष्णु पौडेलविरुद्ध सम्पत्ति शुद्धीकरणको अभियोगमा विशेष अदालतमा मुद्दा चलाइएको छ ।
सम्पत्ति शुद्धीकरण अनुसन्धान विभागले गरेको अनुसन्धानका आधारमा विशेष सरकारी वकिल कार्यालयले उनीविरुद्ध २० करोड ९० लाख रुपैयाँ बिगो माग दाबी गर्दै अभियोगपत्र दर्ता गरेको हो । पौडेलले व्यवसायी दीपक भट्टसँग मिलेर आफ्नो पद तथा प्रभावको गलत फाइदा उठाएको अभियोगपत्रमा उल्लेख छ ।
श्रीराम टोबाको उद्योग प्रालिको महँगो मूल्यको सेयरलाई कम मूल्यमा दीपक भट्टको कम्पनी हिमालयन एसेष्ट म्यानेजमेन्ट प्रालिको नाममा गराएर पौडेलले आर्थिक लाभ लिएको विभागको ठहर छ । लामो समयको अनुसन्धानपछि सरकारी वकिल कार्यालयले यो मामिलालाई अदालतसम्म पुर्याएको हो ।
यसअघि यही अनुसन्धानका सिलसिलामा पौडेललाई गत असार ८ गते सुर्खेतबाट नियन्त्रणमा लिइएको थियो भने सोमबार मात्रै उनको हिरासत अवधि पाँचौँपटक थप गरिएको थियो ।
