काठमाडौँ । राज्य संयन्त्र र समाजको कमजोरीका कारण नागरिकले चरम निराशा भोग्नुपरेको भन्दै नेपाली कांग्रेसका सभापति गगन थापाले गम्भीर चिन्ता व्यक्त गरेका छन् ।
गणेश नेपालीको आत्मदाहको घटनापछि सामाजिक सञ्जालमार्फत आफ्नो धारणा सार्वजनिक गर्दै उनले यस विषयमा सबै पक्षले गहिरो आत्मसमीक्षा गर्नुपर्ने औंल्याएका हुन् । यो घटनाले राज्य सञ्चालन र नागरिकप्रतिको सामाजिक उत्तरदायित्वमाथि ठूलो प्रश्न उठाएको थापाको भनाइ छ ।
सभापति थापाले यस दुःखद घटनालाई राजनीतिक दाउपेच वा आरोप-प्रत्यारोपको माध्यम बनाउन नहुनेमा जोड दिएका छन् । आफ्ना समस्या र पीडा सुनाउनका लागि एउटा नागरिकले शरीरमा आगो नै सल्काउनुपर्ने स्थिति कसरी आयो भन्नेबारे इमानदार जवाफ खोज्न उनले आग्रह गरे । सरकारी सेवा र नीतिहरूले नागरिकलाई सुरक्षा र भरोसा दिन नसकेकै कारण यस्ता घटना दोहोरिने जोखिम रहने हुनाले राज्यका संयन्त्रहरू बेलैमा संवेदनशील हुनुपर्ने उनले उल्लेख गरे ।
उनले समाज, परिवार र राज्य व्यवस्था नागरिकलाई साथ दिन कहाँ चुक्यो भन्नेबारे कठिन प्रश्नहरू आफैँलाई सोध्नुपर्ने बेला आएको बताए । युवाहरू चरम निराशाको अवस्थामा पुग्नु र राज्यकै सामु आफूलाई असहाय महसुस गर्नु चिन्ताजनक रहेको उनको तर्क छ । आगामी दिनमा कुनै पनि नेपाली नागरिकले निराशाका कारण यस्तो आत्मघाती कदम चाल्न नपर्ने वातावरण तयार पार्नु नै गणेश नेपालीप्रतिको सच्चा श्रद्धाञ्जली हुने थापाले स्पष्ट पारेका छन् ।
