काठमाडौँ । भूमिहीन तथा सुकुम्बासी नागरिकको व्यवस्थापनमा सरकार पूर्ण रूपमा असफल भएको राष्ट्रिय स्वतन्त्र पार्टी (रास्वपा) ले आरोप लगाएको छ ।
रास्वपाकी सचेतक एवं सांसद क्रान्ति सिखा धितालले सामाजिक सञ्जालमार्फत आफ्नो धारणा सार्वजनिक गर्दै सरकारको कार्यशैलीप्रति गम्भीर असन्तुष्टि जनाउनुभएको हो । सुकुम्बासी समस्या समाधानका लागि सरकारले आवश्यक संवेदनशीलता, ठोस योजना र जिम्मेवारीबोध देखाउन नसकेको उहाँको टिप्पणी छ ।
अहिलेको भद्रगोल अवस्थाले राज्यको कमजोरी र असक्षमतालाई प्रष्ट पारेको दाबी गर्दै धितालले सडकमा रहेका सुकुम्बासीहरूको आँसुले राज्य सञ्चालकहरूलाई पोल्नुपर्ने बताउनुभयो । उहाँले नागरिकका दुःखप्रति सरकार मूकदर्शक बनेको भन्दै अभिभावकीय भूमिकामाथि समेत प्रश्न उठाउनुभएको छ ।
