काठमाडौँ । देशभर हाल मनसुनी वायुको प्रभाव कायम रहेको जल तथा मौसम विज्ञान विभाग अन्तर्गतको मौसम पूर्वानुमान महाशाखाले जनाएको छ । महाशाखाका अनुसार मनसुनको न्यून चापीय रेखा हाल सरदर स्थानको आसपास अवस्थित रहेको छ ।
हाल देशका हिमाली तथा पहाडी भू-भागका साथै कोशी र सुदूरपश्चिम प्रदेशका तराई भेगमा साधारणतया बदली भएको छ भने बाँकी तराई क्षेत्रमा आंशिक बदली रहेको छ । अहिले कोशी, बागमती, गण्डकी र लुम्बिनी प्रदेशका एक-दुई स्थानमा हल्कादेखि मध्यम वर्षा भइरहेको छ ।
आज दिउँसो देशभर साधारणतया बादल लाग्ने अनुमान गरिएको छ । कोशी, बागमती र गण्डकी प्रदेशका हिमाली भू-भागका केही स्थान तथा लुम्बिनी, कर्णाली र सुदूरपश्चिम प्रदेशका हिमाली क्षेत्रका थोरै स्थानमा मेघगर्जन र चट्याङ्गसहित मध्यम वर्षा वा हिमपातको सम्भावना रहेको छ ।
यस्तै, कोशी, बागमती, गण्डकी र लुम्बिनी प्रदेशका पहाडी भू-भागका धेरै स्थान तथा कर्णाली र सुदूरपश्चिम प्रदेशका पहाडी भू-भागका केही स्थानमा मध्यम वर्षाको सम्भावना छ । मधेश प्रदेशसहित कोशी, बागमती, गण्डकी र लुम्बिनीका तराई भेगका केही स्थान र सुदूरपश्चिमका तराईका थोरै स्थानमा पनि वर्षा हुन सक्नेछ । कोशी र बागमतीका हिमाली तथा पहाडी भू-भागका साथै गण्डकी र लुम्बिनीका पहाडी क्षेत्रका एक-दुई स्थानमा भारी वर्षाको समेत सम्भावना छ ।
आज राति पनि देशभर साधारणतया बदली रहनेछ । कोशी, बागमती र गण्डकीका हिमाली भू-भागका धेरै स्थानमा तथा अन्य प्रदेशका हिमाली भेगका थोरै स्थानमा वर्षा वा हिमपातको सम्भावना छ । पहाडी भू-भागका धेरैजसो ठाउँ तथा तराईका केही स्थानमा मेघगर्जनसहित मध्यम वर्षा हुने पूर्वानुमान छ ।
साथै, कोशी प्रदेशको हिमाली र पहाडी क्षेत्र तथा बागमती, गण्डकी र लुम्बिनीका पहाडी र तराई भू-भागका एक-दुई स्थानमा रातिको समयमा पनि भारी वर्षा हुन सक्ने महाशाखाले जनाएको छ ।
