काठमाडौँ । साउदी प्रो लिगमा अल नासरको जित यात्रा जारी रहेको छ । गएराति सम्पन्न प्रतिस्पर्धात्मक खेलमा अल नासरले अल ताआउनलाई २-१ गोल अन्तरले हराउँदै जारी सिजनमा लगातार चौथो जित दर्ता गरेको हो ।
अल अव्वल पार्कमा खेलको ११औँ मिनेटमै बसाम अल हुरैजीले गोल गर्दै भ्रमणकारी टोली अल ताआउनलाई सुरुआती अग्रता दिलाएका थिए । अल नासरका गोलरक्षकले रोकेको प्रहार रिबाउन्ड भएपछि हुरैजीले त्यसैलाई जाली चुमाएका थिए । तर, पहिलो हाफको थप समयमा साडियो मानेको मिलाइदिएको पासमा सामु कोस्टाले पेनाल्टी बक्स बाहिरबाट उत्कृष्ट गोल गर्दै अल नासरलाई १-१ को बराबरीमा ल्याए ।
दोस्रो हाफको पाँचौँ मिनेटमा मोहम्मद सिमाकानको प्रहारलाई क्रिस्टियानो रोनाल्डोले गोलमा परिणत गर्दै अल नासरलाई २-१ को अग्रता दिलाए । भिडियो सहायक रेफ्री (VAR) को समीक्षापछि उक्त गोलले मान्यता पाएको थियो । त्यसपछि दुवै तर्फबाट थप गोल हुन नसक्दा अल नासर विजयी भयो ।
यो जितसँगै ४ खेलबाट शतप्रतिशत १२ अंक जोड्दै अल नासर अंक तालिकाको शीर्ष स्थानमा कायम छ भने अल ताआउन २ अंकका साथ १५औँ स्थानमा छ । यस खेलको गोलसँगै रोनाल्डोको आधिकारिक करियर गोल संख्या ९७८ पुगेको छ र उनी १ हजार गोलको ऐतिहासिक माइलस्टोनबाट अब २२ गोल मात्र टाढा छन् ।
