काठमाडौँ । देशैभरि मनसुनी वायुको सक्रिय प्रभाव रहँदा धेरैजसो भू-भागमा बदली हुनुका साथै विभिन्न प्रदेशमा वर्षा भइरहेको छ। मौसम पूर्वानुमान महाशाखाका अनुसार मनसुनको न्यून चापीय रेखा हाल सरदर स्थानको आसपास अवस्थित छ।
यतिबेला कोशी र लुम्बिनी प्रदेशका सबै क्षेत्र तथा बागमती, गण्डकी, कर्णाली र सुदूरपश्चिम प्रदेशका पहाडी एवम् हिमाली भू-भागमा साधारणतया बादल लागेको छ। यस्तै मधेश प्रदेशसहित बागमती, गण्डकी र सुदूरपश्चिमका तराई क्षेत्रमा आंशिक बदली रहेको छ। अहिले कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका थोरै स्थानमा हल्कादेखि मध्यम खालको वर्षा भइरहेको महाशाखाले जनाएको छ।
आज दिउँसोभरि नै देशभरको मौसम साधारणतया बदली रहने अनुमान छ। हिमाली क्षेत्रका केही स्थानमा मेघगर्जन र चट्याङ्गसहित मध्यम वर्षा वा हिमपातको सम्भावना छ। पहाडी भू-भागका धेरै स्थानमा मध्यम वर्षा हुनसक्ने देखिन्छ। यस्तै, कोशी, लुम्बिनी र सुदूरपश्चिमका तराई भू-भागका केही ठाउँ तथा मधेश, बागमती र गण्डकीका तराईका थोरै स्थानमा चट्याङ्गसहित मध्यम वर्षाको सम्भावना रहेको छ। कोशी, बागमती र गण्डकीका हिमाली तथा पहाडी भू-भाग, कर्णाली र सुदूरपश्चिमका पहाडी क्षेत्र र लुम्बिनी प्रदेशका पहाडी तथा तराईका एक-दुई स्थानमा भारी वर्षाको जोखिम छ।
रातिको समयमा पनि देशभर मौसम साधारणतया बदली नै रहनेछ। हिमाली क्षेत्रका केही ठाउँमा मेघगर्जन र चट्याङ्गसहित मध्यम वर्षा वा हिमपातको सम्भावना कायम रहनेछ । पहाडी भू-भागका साथै बागमती, गण्डकी, लुम्बिनी र सुदूरपश्चिमका तराई क्षेत्रका धेरैजसो स्थानमा मध्यम वर्षाको अनुमान गरिएको छ।
मधेश र कोशी प्रदेशका तराई भू-भागका थोरै ठाउँमा वर्षा हुनसक्छ। राति कोशी, बागमती र गण्डकीका हिमाली तथा पहाडी भाग, कर्णालीको पहाडी क्षेत्र एवम् लुम्बिनी र सुदूरपश्चिमका पहाडी तथा तराईका थोरै स्थानमा भारी वर्षा र एक-दुई ठाउँमा धेरै भारी वर्षाको सम्भावना रहेकाले आवश्यक सतर्कता अपनाउन महाशाखाले आग्रह गरेको छ।
