काठमाडौँ । उपत्यकामा ग्यासको अभाव भइरहेका बेला सर्वसाधारणलाई राहत दिन नेपाल आयल निगमले काठमाडौँका पाँच प्रमुख स्थानबाट ग्यास सिलिन्डर वितरण गर्ने तयारी गरेको छ।
जिल्ला प्रशासन कार्यालय काठमाडौँ र निगमको सहकार्यमा आज बिहान १० बजेदेखि साँझ ६ बजेसम्म तोकिएका स्थानमा ग्यास उद्योगीहरूले सोझै बिक्री गर्ने व्यवस्था मिलाइएको हो। निगमका अनुसार सर्वसाधारणले टेकुस्थित निगम परिसर, चाबहिलको यातायात कार्यालय परिसर, कपन/बालुवास्थित राधास्वामी परिसर, वसुन्धराको राधास्वामी परिसर र बबरमहलस्थित पुरानो जिल्ला प्रशासन कार्यालय परिसरबाट ग्यास खरिद गर्न सक्नेछन्।
टेकु परिसरबाट नेपाल, एचपी, एभरेस्ट/सुगम, श्रीराम, सगर, सिद्धार्थ, श्री र हिमाल ग्यास बिक्री गरिनेछ। त्यसैगरी चाबहिलमा नेपाल र एचपी ग्यास उपलब्ध हुनेछ भने कपन/बालुवा परिसरबाट नेपाल, एचपी, एभरेस्ट/सुगम, श्रीमाया, श्रीकृष्ण, साईबाबा र ओम ग्यास वितरण गरिने निगमले जनाएको छ।
यस्तै वसुन्धरा परिसरमा नेपाल, एचपी, एभरेस्ट/सुगम, भानु र ओम ग्यास तथा बबरमहलबाट नेपाल, एचपी, एभरेस्ट/सुगम, श्रीराम, सगर, हिमाल, एसटीसी, लोकप्रिय र सूर्य ग्यास खरिद गर्न सकिनेछ। निगमले उपभोक्तालाई आफूले प्रयोग गर्दै आएको ब्रान्डअनुसार तोकिएको स्थानमा पुगेर सिलिन्डर लिन अनुरोध गरेको छ।
