काठमाडौँ । भूकम्पबाट क्षति पुगेको रत्नपार्कस्थित ऐतिहासिक महाङ्काल मन्दिर परिसरको चौघेरा सत्तलको पुनःनिर्माण कार्य सम्पन्न भएको छ ।
काठमाडौँ महानगरपालिकाको करिब ८ करोड ९५ लाख रुपैयाँ लागतमा जीर्णोद्धार गरिएको उक्त सत्तलको महानगरकी कार्यवाहक प्रमुख सुनिता डंगोलले उद्घाटन गर्नुभएको छ ।
सम्पदाको दिगो संरक्षणमा सबैको अपनत्व हुनुपर्नेमा जोड दिँदै कार्यवाहक प्रमुख डंगोलले करदाताको रकमबाट निर्मित संरचनालाई व्यावसायिक प्रयोजनमा नलाई धार्मिक तथा सामाजिक कार्यमा मात्र प्रयोग गरिनुपर्ने स्पष्ट पार्नुभयो ।
वि.सं. १९९७ को पुराना तस्बिरहरूलाई आधार बनाएर परम्परागत शैलीमै ५८३.८१ वर्गमिटर क्षेत्रफलमा यो सत्तल खडा गरिएको छ ।
कार्यक्रममा वडाध्यक्ष, पुरातत्व विभागका महानिर्देशक तथा गुठी संस्थानका प्रतिनिधिहरूले सम्पदाको मौलिकता जोगाउन महानगरले गरेको प्रयासको सराहना गर्नुभयो ।
करिब १ हजार ३०५ वर्ष पुरानो इतिहास बोकेको महाङ्काल मन्दिर काठमाडौँ उपत्यकाका हिन्दू, बौद्ध र मारवाडी समुदायको साझा आस्थाको केन्द्रका रूपमा रहँदै आएको छ।
