काठमाडौँ । प्रतिनिधि सभाअन्तर्गतका विभिन्न पाँचवटा संसदीय समितिहरू आज आ-आफ्नो कार्यसूचीमा छलफल गर्न जुट्दैछन् ।
बिहान साढे ९ बजे बस्ने अर्थ समितिको बैठकमा गठित उपसमितिहरूले तयार पारेका प्रतिवेदनमाथि विस्तृत परामर्श हुने जनाइएको छ ।
त्यस्तै, बिहान १० बजे अन्तर्राष्ट्रिय सम्बन्ध र पर्यटन समितिको बैठक बोलाइएको छ, जहाँ अभौतिक सांस्कृतिक सम्पदा (संरक्षण) विधेयक, २०८१ मा प्रस्तुत संशोधन प्रस्तावहरूबारे संशोधनकर्ता सांसदहरूसँग छलफल हुनेछ । सोही समयमा बस्ने पूर्वाधार विकास समितिमा खानेपानी आपूर्ति कार्ययोजनाको प्रतिवेदनबारे समीक्षा गरिने कार्यसूची छ ।
यसैगरी, बिहान ११ बजे कृषि तथा प्राकृतिक स्रोत समितिको बैठक बस्दैछ, जसमा प्राङ्गारिक तथा जैविक मलको प्रयोग, माटोको अवस्था र दिगो कृषिको सम्भावनाबारे गहन विचार-विमर्श गरिनेछ ।
सोही समयमा महिला तथा सामाजिक मामिला समितिमा राष्ट्रिय दलित आयोगको हालसम्मको प्रगति र कार्यसम्पादनबारे छलफल हुनेछ ।
