बुटवल । लुम्बिनी प्रदेशका मुख्यमन्त्री चेतनारायण आचार्यले प्रदेश सभाबाट बहुमतसहित विश्वासको मत प्राप्त गरेका छन् ।
सोमबार आयोजित प्रदेश सभाको बैठकमा मुख्यमन्त्री आचार्यद्वारा प्रस्तुत विश्वासको मतसम्बन्धी प्रस्तावको पक्षमा ४५ सांसदले मतदान गरेका हुन् । कुल ८३ सदस्यीय प्रदेश सभामा सरकार टिकाइराख्न वा स्पष्ट बहुमत सिद्ध गर्न ४२ मतको आवश्यकता पर्दथ्यो । प्रस्तावको विपक्षमा भने २६ जना सांसदले मत खसालेका छन् ।
सत्ता पक्षीय गठबन्धन र सत्ता साझेदार दलहरू नेकपा एमाले, नेपाली कम्युनिष्ट पार्टी, राष्ट्रिय जनमोर्चा तथा जनता समाजवादी पार्टी (जसपा) नेपालले मुख्यमन्त्री आचार्यलाई समर्थन जनाएका हुन् । जसपा नेपालको केन्द्रीय समितिले सरकारलाई मत नदिन आधिकारिक निर्देशन जारी गरेता पनि लुम्बिनीका प्रदेश सभा सदस्यहरूले उक्त निर्णयको अवज्ञा गर्दै सरकारकै पक्षमा उभिएका छन् ।
बैठकमा कायम रहेको ८३ जना प्रदेश सभा सदस्यहरूमध्ये जम्मा ७१ जना सांसदहरू मतदानको प्रक्रियामा सहभागी भएका थिए ।
