काठमाडौँ । देशभर मनसुनी वायु सक्रिय रहँदा मौसममा उल्लेख्य बदलाव आएको छ । जल तथा मौसम विज्ञान विभाग, मौसम पूर्वानुमान महाशाखाका अनुसार मनसुनको न्यून चापीय रेखा पूर्वतर्फ सरदर स्थान आसपास र पश्चिमतर्फ सरदर स्थानभन्दा उत्तर अर्थात् नेपाल नजिक अवस्थित रहेकाले मुलुकभर वर्षाको सम्भावना बढेको हो ।
हाल देशभर साधारणतया बदली रही बागमती, गण्डकी र लुम्बिनी प्रदेशका केही तथा कोशी, मधेश, कर्णाली र सुदूरपश्चिमका थोरै स्थानमा मध्यम वर्षा भइरहेको छ । आज दिउँसो पनि देशभर आंशिकदेखि साधारणतया बादल लागिरहने महाशाखाले जनाएको छ ।
दिउँसो गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली भू-भागका धेरैजसो स्थानमा मेघगर्जन र चट्याङ्गसहित हल्कादेखि मध्यम वर्षाको आकलन गरिएको छ । त्यस्तै, कोशी र बागमतीका पहाडी क्षेत्र तथा तराईका विभिन्न स्थानमा मध्यम वर्षाको सम्भावना छ । सुदूरपश्चिम, लुम्बिनी र कर्णालीका पहाडी तथा तराईका एक-दुई स्थानमा भारी वर्षा हुनसक्ने अनुमान छ भने लुम्बिनी प्रदेशको तराई क्षेत्रमा धेरै भारी वर्षाको जोखिम रहेको छ ।
रातिको समयमा पनि देशभर मौसम बदली नै रहनेछ । देशका पहाडी तथा हिमाली भागका केही स्थानमा मेघगर्जनसहित मध्यम वर्षा तथा उच्च हिमाली क्षेत्रमा हिमपातको सम्भावना छ । त्यसैगरी कोशी, बागमती, गण्डकी, लुम्बिनी, सुदूरपश्चिम र मधेश प्रदेशका तराई क्षेत्रमा समेत मध्यम वर्षाको सम्भावना रहेको महाशाखाले जनाएको छ ।
