काठमाडौँ । त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा जारी पहिलो संस्करणको नेपाल भलिबल लिग (एनभीएल) अन्तर्गत आज दुई खेलहरू हुँदैछन् ।
तालिका अनुसार पहिलो प्रतिस्पर्धामा दिउँसो ४ बजे अन्नपूर्ण स्पाइकर्स र काठमाडौँ रेड्स आमनेसामने हुनेछन्। त्यसैगरी साँझ ७ बजे हुने दोस्रो खेलमा कर्णाली शिवराज र खप्तड फाल्कन्सबीच प्रतिस्पर्धा हुनेछ ।
यसअघिका खेलहरूमा अन्नपूर्णले आफ्नो पहिलो खेलमा कर्णालीसँग हार बेहोरेको थियो भने काठमाडौँले मधेश वारियर्सलाई पराजित गर्दै विजयी सुरुआत गरेको छ । अर्कोतर्फ कर्णालीले पहिलो खेलमै जित दर्ता गरिसकेको छ भने खप्तडले सगरमाथा स्म्यासर्ससँग पराजय भोगेको थियो ।
केडिया समूहको आयोजना तथा नेपाल भलिबल संघको प्राविधिक सहयोगमा सञ्चालित यस प्रतियोगितामा छ टोली सहभागी छन् । नेपाली पुरुष भलिबल इतिहासकै सर्वाधिक नगद पुरस्कार राशि रहेको यस फ्रेन्चाइज लिगको विजेताले २० लाख रुपैयाँ प्राप्त गर्नेछ ।
भदौ २७ गतेसम्म चल्ने लिगको सिङ्गल राउन्ड-रबिन चरणपछि तालिकाको शीर्ष स्थानमा रहने टोली सोझै फाइनल पुग्नेछ भने दोस्रो र तेस्रो स्थानका टोलीले प्लेअफमार्फत फाइनल यात्रा तय गर्नेछन् ।
