काठमाडौँ । रसुवामा हालै आएको विनाशकारी बाढीपछि सहायताका लागि खोलिएको ‘प्रधानमन्त्री दैवी प्रकोप उद्धार तथा राहत कोष’ मा कुल ६ अर्ब ३६ करोड रुपैयाँभन्दा बढी सङ्कलन भएको छ ।
प्रधानमन्त्री बालेन्द्र शाहले सामाजिक सञ्जालमार्फत सार्वजनिक गर्नुभएको विवरणअनुसार सोमबार दिउँसोसम्म नौवटा वाणिज्य बैंकका खातामा ५ अर्ब ८७ करोड ९२ लाख २३ हजार ८४२ रुपैयाँ स्वदेशी मुद्रा जम्मा भएको छ ।
यसका साथै हिमालयन बैंक र लक्ष्मी बैंकमा रहेका खाताहरूमा ३१ लाख ९३ हजार २३८ अमेरिकी डलर (नेपाल राष्ट्र बैंकको सोमबारको विनिमय दरअनुसार करिब ४८ करोड ६३ लाख ६२ हजार ८० रुपैयाँ) दाखिला भएको छ ।
दुवै विदेशी तथा स्वदेशी रकम जोड्दा राहत कोषमा कुल ६ अर्ब ३६ करोड ५५ लाख ८५ हजार ९२२ रुपैयाँभन्दा बढी दाखिला भइसकेको जानकारी प्रधानमन्त्री शाहले दिनुभएको छ ।
