डेढगाउँ । कालीगण्डकी नदीमा आएको बाढीले कटान गरेपछि नवलपरासी (बर्दघाट सुस्ता पूर्व) र तनहुँ जोड्ने मोटरेबल पुलको पहुँचमार्ग पूरै जोखिममा परी आवतजावत ठप्प भएको छ ।
कालीगण्डकी करिडोरअन्तर्गत नवलपरासीको बौदीकाली गाउँपालिका–२ स्थित डेढगाउँ र तनहुँको घिरिङ गाउँपालिका–मन्दार जोड्ने पुलको डेढगाउँतर्फको सडक नदीले कटान गरेर भासिएको हो । पुलको एक किनाराको भाग व्यापक रूपमा धसिएपछि अहिले सो क्षेत्रमा साना-ठूला सवारीसाधनका साथै पैदल यात्रुलाई समेत आउजाउमा पूर्ण रोक लगाइएको छ ।
सडक अवरुद्ध भएसँगै सर्वसाधारणलाई सुरक्षित रहन र वैकल्पिक बाटो प्रयोग गर्न स्थानीय प्रशासनले अनुरोध गरेको छ । अर्को व्यवस्था वा सूचना जारी नभएसम्मका लागि उक्त मार्ग भएर यात्रा नगर्न समेत आग्रह गरिएको छ ।
